Styrkir veittir úr menningarsjóði Þjóðleikhússins

Að þessu sinni hljóta þrír listamenn viðurkenningu, og er viðurkenningin er veitt fyrir ágæt störf í þágu Þjóðleikhússin og þá jafnframt leiklistarinnar í heild,

Sýning Þjóðleikhússins á Macbeth hlaut Grímuna sem sýning ársins

Gríman - íslensku leiklistarverðlaunin voru veitt í Þjóðleikhúsinu í gær. Sýningar Þjóðleikhússins voru sigursælar á Grímunni, og var sýning leikhússins á Macbeth eftir William Shakespeare í leikstjórn Benedicts Andrews valin besta leiksýning ársins. Macbeth hlaut alls fern Grímuverðlaun, Halldór Örn Óskarsson hlaut Grímuna fyrir lýsingu, Oren Ambarchi fyrir tónlist og þeir Kristinn Gauti Einarsson og Oren Ambarchi fyrir hljóðmynd ársins.

Englar alheimsins í leikstjórn Þorleifs Arnar Arnarssonar höfðu verið tilnefndir til níu Grímuverðlauna, meðal annars sem sýning ársins. Hlutu leikgerðarhöfundarnir, þeir Þorleifur Örn Arnarsson og Símon Birgisson, ásamt Einari Má Guðmundssyni höfundi skáldsögunnar, verðlaunin fyrir leikrit ársins, Vytautas Narbutas fyrir leikmynd og Filippía I. Elísdóttir fyrir búninga.

Kristbjörg Kjeld var valin leikkona ársins í aðalhlutverki fyrir leik sinn í leiksýningu Þjóðleikhússins Jónsmessunótt eftir Hávar Sigurjónsson í leikstjórn Hörpu Arnardóttur.

Gunnar Eyjólfsson var heiðraður fyrir ævistarf í þágu sviðslista á Íslandi, en Gunnar hefur átt langan og farsælan starfsferil við Þjóðleikhúsið og óskar leikhúsið honum hjartanlega til hamingju.

Þjóðleikhúsið þakkar áhorfendum samfylgdina á þessu góða leikári, og vekur athygli á því að sýningar á Englum alheimsins munu hefjast aftur í haust.

Þrjár leikkonur hlutu styrk úr Egnersjóði Þjóðleikhússins

Þrír styrkir voru veittir úr Egnersjóði um liðna helgi, og er það í annað sinn á leikárinu sem veitt er úr sjóðnum, en Þjóðleikhúsið sýnir nú bæði Dýrin í Hálsaskógi og Karíus og Baktus eftir Thorbjörn Egner.

Egnersjóðurinn var stofnaður árið 1975 á 25 ára afmæli Þjóðleikhússins. Þá heimsótti Thorbjörn Egner leikhúsið og gaf því sýningarrétt og höfundarlaun verka sinna á Íslandi. Tekjur sjóðsins hafa verið nýttar til að veita styrki til leikhúsfólks og til að efla leikhússtarf í þágu barna.

Þrjár leikkonur, þær Lilja Guðrún Þorvaldsdóttir, Ólafía Hrönn Jónsdóttir og Ragnheiður Steindórsdóttir hlutu styrk úr Egnersjóði Þjóðleikhússins á síðustu sýningu vorsins á Dýrunum í Hálsaskógi.  Allar hafa þessar leikkonur farið með mörg veigamikil hlutverk í leikritum Thorbjörns Egners í Þjóðleikhúsinu í gegnum tíðina og eiga það meðal annars sameiginlegt að hafa allar farið með hlutverk Soffíu frænku í Kardemommubænum og ýmist ömmu músar eða bangsamömmu í Dýrunum í Hálsaskógi. Auk þess hafa þær leikið í fjölda annarra barnaverka í Þjóðleikhúsinu.

Dýrin í Hálsaskógi eru nú komin í sumarleyfi, en vegna mikillar eftirspurnar hefur verið bætt við nokkrum aukasýningum í haust.

Þjóðleikhúsið óskar þeim Lilju Guðrúnu, Ólafíu Hrönn og Ragnheiði til hamingju með viðurkenninguna og þakkar þeim starf í þágu barnaleikhúss.