2017-2018

Brúðkaup Fígarós

Óperuuppfærsla í samstarfi við Íslensku óperuna

Íslenska óperan setur upp Brúðkaup Fígarós, í samstarfi við Þjóðleikhúsið, á Stóra sviðinu.

Óperan er byggð á gamanleikriti Beaumarchais og er full af fyndnum uppákomum, misskilningi og óvæntum uppljóstrunum. Verkið hefur engu að síður alvarlegan undirtón og felur í sér leiftrandi ádeilu á samskipti yfirstéttar og alþýðu.

Sagan gerist í kastala Almaviva greifa, í nágrenni Sevilla. Hinn kvensami greifi rennir hýru auga til Súsönnu, sem er þjónustustúlka eiginkonu hans. Daginn sem Súsanna á að giftast Fígaró hyggst greifinn nýta sér aldagamlan herrarétt til að sænga hjá henni. Greifafrúin og Súsanna taka höndum saman um að leika á greifann, og klækjabrögð þeirra hafa ýmsar kostulegar afleiðingar.

Ópera um ást, hjónaband, stéttaskiptingu og forréttindi, í nýrri og bráðskemmtilegri uppfærslu!


Íslenska óperan býður áhorfendum upp á umræður eftir 6. sýningu á Brúðkaupi Fígarós 5. október.