Dagbók Þjóðleikhússins (Síða 3)

Fyrirsagnalisti

Leitin að Rómeó - 05. maí 2020 15:02

Þjóðleikhúsið undirbýr nú viðamikla uppsetningu á Rómeó og Júlíu eftir William Shakespeare í leikstjórn Þorleifs Arnar Arnarssonar. Sýningin verður frumsýnd í byrjun mars 2021. Nú er unnið að mönnun sýningarinnar en einvala hópur listrænna stjórnenda hefur verið ráðinn að verkefninu við hlið Þorleifs Arnar. Júlía er fundin en hver er Rómeó?

Orðsending í tilefni alþjóðlega dansdagsins - 29. apríl 2020 10:52

Alþjóðlegi dansdagurinn er 29. apríl. Saga danslistar á Íslandi er samofin sögu Þjóðleikhússins. Fyrsti íslenski ballettinn var sýndur á Listamannaþingi í Þjóðleikhúsinu árið 1950, Eldurinn eftir Sigríði Ármann, byggður á samnefndu kvæði Einars Benediktssonar, með tónlist eftir Jórunni Viðar. Árlega sendir dansnefnd ITI/UNESCO út orðsendingu í tilefni dagsins. Hér má lesa "Orðsendingu í tilefni alþjóðlega dansdagsins 29. apríl 2020" eftir Gregory Vuyani MAQOMA, frá Suður-Afríku, en hann er dansari, leikari, danshöfundur og danskennari. Steinunn Þorvaldsdóttir þýddi orðsendinguna yfir á íslensku.

Draumur þjóðar - 24. apríl 2020 11:46

Grein Lilju Alfreðsdóttur mennta- og menningarmálaráðherra sem birtist í Morgunblaðinu á sumardaginn fyrsta, 23. apríl 2020.

Leikhús þjóðarinnar í 70 ár - 24. apríl 2020 10:10

Þjóðleikhúsið fagnaði 70 ára afmæli á sumardaginn fyrsta árið 2020. Þrátt fyrir að hátíðarhöldum hafi verið slegið á frest fram á haustið vegna samkomubannsins minntumst við þessara tímamóta með margvíslegum hætti. Magnús Geir Þórðarson þjóðleikhússtjóri flutti ávarp, Tinna Gunnlaugsdóttir og Stefán Baldusson fyrrum þjóðleikhússtjórar ræddu við Melkorku Teklu Ólafsdfóttur um margþætta upplifun sína af leikhúsinu.

Svona færð þú nýja miða á sýningar í haust! - 21. apríl 2020 13:38

Vegna samkomubanns hefur Þjóðleikhúsið þurft, eins og aðrir, að fella niður sýningar nú í vor. Nýtt leikár Þjóðleikhússins hefst hins vegar fyrr og af meiri krafti í ágúst. Þeir sem áttu miða á sýningar sem felldar voru niður í vor fá nýja miða á nýjar sýningar í haust. Starfsfólk okkar mun gera sitt allra besta til að liðsinna gestum okkar og tryggja að allir geti notið þeirra sýninga sem þeir höfðu tryggt sér miða á. 

Þrír öflugir stjórnendur ganga til liðs við Þjóðleikhúsið - 20. apríl 2020 11:52

Eftir skipulagsbreytingar síðustu mánaða í Þjóðleikhúsinu hafa nú verið ráðnir þrír nýir öflugir stjórnendur í Þjóðleikhúsið. Störf þeirra koma í stað þriggja annarra starfa sem voru aflögð sem hluti af áherslu- og skipulagsbreytingum í leikhúsinu. Nýju starfsmennirnir eru allir afar reynslumiklir á sviði leikhúsa, menningar og þjónustu. Steinunn Þórhallsdóttir tekur við sem framkvæmdastjóri leikhússins, Jón Þorgeir Kristjánsson tekur við sem forstöðumaður samskipta og markaðsmála og Kristín Ólafsdóttir tekur við nýju starfi þjónustu- og upplifunarstjóra. Þau munu koma til starfa á næstu mánuðum við að undirbúa nýtt, glæsilegt leikár Þjóðleikhússins sem hefst í lok ágúst. Þessar breytingar nú koma í kjölfar endurnýjunar í hópi listrænna stjórnenda leikhússins og skipulagsbreytinga sem kynntar voru í mars. Markmið breytinganna eru að bæta listrænt starf og gæði, að opna leikhúsið og sækja nýja leikhúsgesti og síðast en ekki síst að bæta þjónustu og upplifun leikhúsgesta. Magnús Geir Þórðarson tók við sem leikhússtjóri þann 1. janúar síðastliðinn. 

Síða 3 af 17