Karl Olgeirsson

  • Karl-Olgeirsson

Karl Olgeirsson sér um tónlistarstjórn, píanóleik og leikhljóð í Einræðisherranum í Þjóðleikhúsinu leikárið 2018-2019.

Karl Olgeir Olgeirsson hefur komið víða við í íslensku tónlistarlífi sem sem lagahöfundur, söngvari og hljóðfæraleikari. Píanóið er aðalhljóðfæri hans, en hann leikur á fjölmörg önnur hljóðfæri. Karl hefur meðal annars samið tónlist fyrir kvikmyndir og starfað við hljóðstjórn og útsetningar á fjölda hljómplata. Hann kemur reglulega fram með jazztríóum sínum Hot Eskimos og Karl Orgeltrio. Hann er tónlistarstjóri spunahópsins Improv Iceland. Hann var tónlistarstjóri og útsetjari fyrir Frostrósir um ellefu ára skeið. Hann sá um kórútsetningar fyrir hljómplötu Bjarkar Medúllu.

Meðal verkefna Karls í leikhúsi, sem tónlistarstjóri, útsetjari og/eða lagahöfundur eru Kommúnan og Rómeó og Júlía hjá Vesturporti, Ronja ræningjadóttir og Kalli á þakinu í Borgarleikhúsinu, Paris at Night (tilnefning til Grímunnar) og Hinn fullkomni jafningi hjá leikhópnum Á senunni og Sporvagninn Girnd og Djöflaeyjan hjá Leikfélagi Akureyrar.

Hann hefur jafnframt verið hljómsveitarstjóri og hljómsveitarmeðlimur í fjölda sýninga en meðal þeirra eru Slá í gegn, Hrói Höttur, Lína Langsokkur, Kiss Me Kate, Chicago, Litla hryllingsbúðin, Evita og Rocky Horror Show.

Hann hefur samið tónlist fyrir Útvarsleikhúsið og kvikmyndina Ófeigur gengur aftur (tilnefning til Eddunnar), Áramótaskaupið og heimildamyndirnar Love Is In The Air, Leiftrið Bjarta og Stephan G.