Gretar Reynisson

  • Gretar Reynisson

Gretar er höfundur leikmyndar fyrir Súper í Þjóðleikhúsinu leikárið 2018-2019.

Gretar lauk myndlistarnámi úr nýlistadeild Myndlistar- og handíðaskóla Íslands 1978 og var við framhaldsnám í Amsterdam 1978-79. 

Gretar hefur haldið á þriðja tug einkasýninga, meðal annars í Listasafni Reykjavíkur, Nýlistasafninu, Galleríi i8, Listasafni ASÍ og víðar og tekið þátt í samsýningum bæði hér heima og erlendis, meðal annars á Listasafni Íslands, Kjarvalsstöðum, í Nýlistasafninu og með Myndhöggvarafélaginu í Reykjavík. Hann á verk í eigu safna og stofnana, svo sem Listasafns Íslands, Listasafns Reykjavíkur, Listasafns Háskólans og Nýlistasafnsins. Hann var heiðurslistamaður á myndlistarhátíðinni Sequences 2013.

Gretar hóf feril sinn sem leikmyndahöfundur árið 1980 og hefur gert yfir 70 leikmyndir.

Gretar hefur gert leikmyndir hér í Þjóðleikhúsinu við Milli skinns og hörunds, Bílaverkstæði Badda, Stóran og smáan, Rómeó og Júlíu, Gleðispilið, Stræti, Ferðalok, Tröllakirkju, Sem yður þóknast, Villiöndina, Meiri gauragang, Gamansama harmleikinn, Solveigu, Krítarhringinn í Kákasus, Antígónu, Önnu Kareninu, Halta Billa, Græna landið, Þetta er allt að koma, Pétur Gaut, Ívanov, Utan gátta, Gerplu, Allir synir mínir, Heimsljós, Afmælisveisluna, Segulsvið og Svartalogn.

Hjá Leikfélagi Reykjavíkur gerði hann meðal annars leikmyndir fyrir Draum á Jónsmessunótt, Gísl, Hamlet, Djöflaeyjuna, Ljós heimsins, Lé konung, Don Quixote, Draumleik, Ófögru veröld, Jeppa á Fjalli, Hver er hræddur við Virginíu Woolf? og Sendingu.

Meðal annarra verkefna hans sem leikmyndarhöfundar eru Óþelló og Draumur á Jónsmessunótt hjá Nemendaleikhúsinu, Rhodymenia Palmata, Kirsuberjagarðurinn og Makbeð hjá Frú Emilíu og Ofviðrið hjá Riksteatern í Svíþjóð. 

Hann gerði leikmynd fyrir óperurnar Il trovatore og Ragnheiði í Íslensku óperunni.

Gretar hefur hlotið Grímuna-Íslensku sviðslistaverðlaunin fimm sinnum, fyrir leikmynd í Þetta er allt að koma, Draumleik, Ófögru veröld og Utan gátta, og fyrir búninga í Utan gátta. Hann hefur hlotið fimmtán tilnefningar til Grímunnar, meðal annars fyrir Súper, Sendingu, Halta Billa, Græna landið, Pétur Gaut, Ívanov, Gerplu og Ragnheiði. Hann hlaut menningarverðlaun DV fyrir Ljós heimsins. Gretar hlaut Stefaníustjakann fyrir störf sín að leiklist árið 2006.