Filippía I. Elísdóttir

  • Filippía I. Elísdóttir

Filippía gerir búninga fyrir Súper - þar sem kjöt snýst um fólk í Þjóðleikhúsinu leikárið 2018-2019.

Filippía hefur komið að á annað hundrað sýningum sem búninga- og sviðsmyndahönnuður, listrænn ráðgjafi og höfundur gjörninga. Sem búninga- og sviðsmyndahönnuður hefur hún starfað fyrir leikhús, óperur og kvikmyndir, jafnt á Íslandi sem erlendis, og hlotið ýmis konar viðurkenningar fyrir störf sín.

Hér í Þjóðleikhúsinu gerði Filippía búninga fyrir Djöflaeyjuna Sporvagninn Girnd, Sjálfstætt fólk - hetjusögu, Engla alheimsins, Tveggja þjón, Heddu Gabler, Frida... viva la vida, Engisprettur, Virkjunina, Sorgin klæðir Elektru, Norður, Vegurinn brennur, Jón Gabríel Borkmann, Með fullri reisn, Vatn lífsins, Laufin í Toscana, Meiri gauragang og Leitt hún skyldi vera skækja. Hún gerði hér einnig búninga fyrir Draum á Jónsmessunótt, Hamlet og Ríkarð þriðja í samstarfi við Vytautas Narbutas og aðstoðaði sama listamann við búninga fyrir Kirsuberjagarðinn. Hún gerði búninga fyrir 4:48 Psychosis sem sýnt var í samvinnu við Edda Productions. Einnig gerði hún leikmynd og búninga fyrir Ég heiti Guðrún sem var sýnt í samvinnu við Leiktóna.

Í Borgarleikhúsinu gerði Filippía búninga fyrir Ríkharð III, Rocky Horror, Mamma Mia, Medeu, Mávinn, Ofviðrið, Fást, Milljarðamærin snýr aftur, Fólkið í blokkinni, Gauragang, Híbýli vindanna, Lífsins tré, Woyzeck, Gretti, Fjandmann fólksins og Boðorðin 9. 

Filippía gerði búninga fyrir Túskildingsóperuna í Nemendaleikhúsi LHÍ, söngleikinn Rocky Horror í Loftkastalanum og Svik sem Sögn, Á senunni og LA sýndu. Hún gerði búninga fyrir Ferðalag Fönixins á Listahátíð í Reykjavík.

Hún hannaði búninga fyrir Brottnámið úr kvennabúrinu, Flagara í framsókn, Sweeney Todd, La Traviata, Rigoletto, Töfraflautuna og La Boheme hjá Íslensku óperunni.

Filippía gerði búninga fyrir Túskildingsóperuna, La Boheme og Pétur Gaut hjá Borgarleikhúsinu í Wiesbaden, Lohengrin, Leðurblökuna og La Boheme í óperuhúsinu í Augsburg, Rómeó og Júlíu í St. Gallen og Borgarleikhúsinu í Mainz, Meistarann og Margarítu í Tubingen, og Grimm og Pétur Gaut hjá Luzerner Theater í Sviss. Síðastnefnda sýningin var valin af gagnrýnendum og áhorfendum besta þýskumælandi sýning ársins á Nachtkritik.de.
Hún gerði búninga fyrir Hamlet í Odense Teater í Danmörku og Galdra-Loft hjá SOF-Teater í Noregi. Hún gerði búninga fyrir Tartuffe í leikstjórn Korsunovas í Árósum í Danmörku.
Hún gerði sviðsmynd og búninga fyrir Open source dansleikhúsið fyrir listahátíðirnar í Galway á Írlandi og Ghent í Belgíu, og Apart dansleikhús fyrir Borgarleikhúsið í Braunzweig.

Filippía vann við kvikmyndirnar Ungfrúin góða og húsið og Dagurinn í gær.

Filippía hlaut Grímuna-Íslensku leiklistarverðlaunin fyrir Töfraflautuna, Ofviðrið, Sweeney Todd, Virkjunina, Woyzeck, Engla alheimsins og Dúkkuheimili. Hún hefur verið tilnefnd til Grímunnar tuttugu sinnum, nú síðast fyrir Húsið, en verðlaunin voru fyrst veitt árið 2003.
Hún hefur verið tilnefnd til Menningarverðlauna DV fyrir búninga sína.
Hún hlaut Stefaníustjakann, viðurkenningu úr sjóði Stefaníu Guðmundsdóttur, árið 2010.
Filippía hlaut Fálkaorðuna árið 2016.