Sólveig Guðmundsdóttir

Leikkona

Sólveig leikur í Efa í Þjóðleikhúsinu leikárið 2017-2018, og er það fyrsta verkefni hennar hér. Einnig tók hún við hlutverki Konu í Föðurnum .

Sólveig lærði leiklist við The Arts Educational School í London og útskrifaðist árið 2002.  

Sólveig er ein af stofnendum Kvenfélagsins Garps og hefur unnið sem sjálfstætt starfandi leikkona, höfundur og framleiðandi við fjölda leiksýninga með sjálfstæðum leikhópum – m.a. með Hafnarfjarðarleikhúsinu, GRAL, Opið út, Rauða þræðinum, Leikhúsinu 10 fingrum og Óskabörnum ógæfunnar. 

Helstu hlutverk Sólveigar á leiksviði eru; Dís í Gunnlaðar sögu, Una í Svörtum fugli, Jórunn í Með horn á höfði, Dóri Maack í Pörupiltum, Pozzo í Beðið eftir Godot, Hjartadrottningin í Lísa í Undralandi hjá MAK, Agnes í Illsku og Sóley Rós í verkinu Sóley Rós ræstitæknir sem Sólveig skrifaði ásamt Maríu Reyndal leikstjóra.  

Sólveig hefur farið með hlutverk í hinum ýmsu útvarpsverkum, sjónvarpsþáttum og kvikmyndunum m.a. Pressu, Kaldri slóð, Andið eðlilega, Lof mér að falla og Tryggð.

Barnlaleikritið Lífið - stórkostlegt drullumall sem Sólveig skrifaði ásamt öðrum listamönnum sýningarinnar  hlaut tvenn Grímuverðlaun árið 2015; barnaleikverk ársins og sproti ársins. Þá  hlaut Sólveig Grímuverðlaunin árið 2017 í flokknum leikkona ársins í aðalhlutverki fyrir Sóleyju Rós ræstitækni en verkið hlaut einnig verðlaun sem leikrit ársins. Sólveig hlaut Menningarverðlaun DV  2017 fyrir leik sinn í Illsku og Sóleyju Rós. 

(Ljósmynd: Jónatan Grétarsson)