Elva Ósk Ólafsdóttir

Leikkona

Elva Ósk leikur í Svartalogni hér í Þjóðleikhúsinu leikárið 2018-2019. Hún leikur jafnframt í samstarfsverkefninu Ég heiti Guðrún.

Elva Ósk hefur farið með fjölda burðarhlutverka við Þjóðleikhúsið, meðal annars í Gauragangi, Snædrottningunni, Oleönnu, Stakkaskiptum, Þreki og tárum, Don Juan, Sem yður þóknast, Grandavegi 7, Óskastjörnunni, Komdu nær, Brúðuheimilinu, Horfðu reiður um öxl, Vilja Emmu, Veislunni, Rauða spjaldinu, Jóni Gabríel Borkmann, Þetta er allt að koma, Edith Piaf, Öxinni og jörðinni, Dínamíti, Hjónabandsglæpum, Hart í bak og Hafinu (2017).


Leikfélag Akureyrar

Elva Ósk lék veigamikil hlutverk í Húsi Bernörðu Alba og Íslandsklukkunni hjá Leikfélagi Akureyrar.


Leikfélag Reykjavíkur

Elva Ósk hefur meðal annars leikið í Ferjunni, Hamlet, Ég er meistarinn, Kjöti, Heima hjá ömmu og Englum í Ameríku í Borgarleikhúsinu. Hún lék einnig í Nóttin nærist á deginum, sem var samstarfsverkefni í Borgarleikhúsinu.


Vesturport

Elva Ósk hefur leikið í Hamskiptunum hjá Vesturporti, jafnt hér á Íslandi og á leikferðum erlendis. 


Sjónvarp og kvikmyndir

Elva Ósk hefur leikið í nokkrum kvikmyndum, meðal annars í Ófeigur gengur aftur, Stuttum frakka, Benjamín dúfu, Ikingut, Hafinu og Kaldri slóð. Hún lék einnig í framhaldsþáttunum Erninum hjá Danmarks Radio.


Verðlaun og viðurkenningar

Elva Ósk hlaut Menningarverðlaun DV í leiklist fyrir túlkun sína á hlutverki Nóru í Brúðuheimili og var tilnefnd til Grímuverðlaunanna fyrir leik sinn í Veislunni og Hjónabandsglæpum. Hún hlaut Edduverðlaunin fyrir leik sinn í Hafinu. Elva Ósk Ólafsdóttir hlaut Stefaníustjakann fyrir störf sín að leiklist árið 2007.