Ebba Katrín Finnsdóttir útskrifaðist af leikarabraut Listaháskóla Íslands 2018. Í vetur leikur hún í Orð gegn orði (Prima Facie), Frosti og Ellen B. Hún lék hér annað titilhlutverkið í Rómeó og Júlíu og var einn af höfundum tónlistar í sýningunni, lék Uglu í Atómstöðinni-endurliti, lék í Nokkrum augnablikum um nótt, Ást og upplýsingum og Meistaranum og Margarítu. Í Borgarleikhúsinu lék hún í Dúkkuheimili 2. hluta, NÚNA 2019, Hamlet litla og Matthildi. Hún lék í Temple of Alternative Histories í Staatstheater Kassel. Hún leikur aðalhlutverk í þáttaröðinni Húsó sem verður frumsýnd á árinu og fór með annað aðalhlutverkið í sjónvarpsmyndinni Mannasiðum á RÚV. Ebba Katrín lék í kvikmyndinni Agnesi Joy, þáttaseríunum Venjulegu fólki 2 og 3, stuttmyndunum Samræmi og Sorg étur hjarta og hefur leikið þrisvar í Áramótaskaupi RÚV. Hún hlaut Grímuverðlaunin fyrir leik sinn í Atómstöðinni og var tilnefnd fyrir leik sinn í Ellen B., Matthildi og fyrir tónlist og leik í Rómeó og Júlíu.

Nánar um feril:

Ebba Katrín útskrifaðist af leikarabraut Listaháskóla Íslands vorið 2018. Eftir útskrift bauðst Ebbu samningur við Borgarleikhúsið þar sem hún lék Emmu í Dúkkuheimili 2. hluti, Marínu í NÚNA 2019, Ófelíu og Laertes í Hamlet litli og Filippíu í söngleiknum Matthildur.
Ebba starfar nú við Þjóðleikhúsið. Fyrsta verkefni hennar í Þjóðleikhúsinu var hlutverk Uglu í Atómstöðinni í leikstjórn Unu Þorleifsdóttur. Meðal annara hlutverka eru Júlía; Rómeó og Júlía, Korovief; Meistarinn og Margaríta, Björk; Nokkur augnablik um nótt og ýmis hlutverk í Ást og Upplýsingar. Sumarið 2022 fór hún með hlutverk Brynhildar Buðladóttur og völvu í uppsetningu Þorleifs Arnar Arnarssonar; Temple of Alternative Histories sem sýnt var í Staatstheater Kassel, Þýskalandi.
Ebba lék annað aðalhlutverka í sjónvarpsmyndinni Mannasiðir eftir Maríu Reyndal en myndin var valin besta leikna sjónvarpsefnið á Eddunni 2019. Í kjölfarið hefur hún leikið í stuttmyndinni Samræmi, kvikmyndinni Agnes Joy, þáttaseríunum Venjulegt Fólk 2 og Venjulegt Fólk 3, Áramótaskaupi sjónvarpsins 2019/2020/2021, sjónvarpsauglýsingum ásamt því að hafa lesið inn á auglýsingar og tekið þátt í útvarpsleikritum.
Ebba Katrín hlaut Grímuverðlaunin 2020 sem besta leikkona í aðalhlutverki fyrir túlkun sína á Uglu í Atómstöðinni.
Tilnefningar
Gríman 2021, leikkona í aðalhlutverki fyrir hlutverk Júlíu í Rómeó & Júlía
Gríman 2021, tónlist ársins fyrir tónlist í Rómeó & Júlía
Gríman 2019, leikkona í aukahlutverki fyrir hlutverk Filippíu í söngleiknum Matthildur