Björn Thors

  • Bjorn-Thors

Björn Thors leikur Búa Árland í Atómstöðinni í Þjóðleikhúsinu leikárið 2019-2020.

Björn lauk B.F.A. gráðu í leiklist frá Listaháskóla Íslands vorið 2003. Björn hefur síðan meðal annars leikið hjá Þjóðleikhúsinu, Borgarleikhúsinu, Vesturporti, Frú Emilíu, Volksbühne í Berlín, Burgtheater í Vínarborg, Lyric Hammersmith í London og The Royal Alexandra í Toronto, og hefur auk þess farið með hlutverk í ýmsum kvikmyndum, t.a.m. Kona fer í stríð, París norðursins, Djúpinu, Frost, Þetta reddast og Borgríki. 

Björn var einn handritshöfunda og annar tveggja leikstjóra kvikmyndarinnar Reykjavík Guesthouse - rent a bike. Hann var sömuleiðis einn höfunda einleiksins um Kenneth Mána. Björn var meðhöfundur og leikstýrði uppfærslu heimildaverksins Flóðs í Borgarleikhúsinu. Sýningin hlaut Sprotann, nýsköpunarverðlaun Leiklistarsambandsins og var einnig tilnefnd til Grímunnar sem besta sýning ársins. Útvarpsserían Flóð fékk tilnefningu til Prix Europa verðlaunanna 2016. 

Björn hefur hlotið fern Grímuverðlaun, fyrir Græna Landið, Vestrið eina, Íslandsklukkuna og Afmælisveisluna og var tilnefndur fyrir Alla syni mína, Killer Joe, Dínamít, Heimsljós, Kenneth Mána, Brot úr hjónabandi, Fólk, staði og hluti og Bæng. Hann fékk Edduverðlaunin fyrir leik sinn í sjónvarpsseríunni Fangavaktinni og tilnefningu fyrir hlutverk sín í Come To Harm, Djúpinu og Frost. Hann hefur auk þess verið tilnefndur tvisvar til Menningarverðlauna DV og einu sinni til Nýsköpunarverðlauna Forseta Íslands. Björn hlaut Stefaníustjakann árið 2017, viðurkenningu úr minningarsjóði Frú Stefaníu Guðmundsdóttur fyrir störf sín í leiklist.