Arndís Hrönn Egilsdóttir

  • Arndís Hrönn
Arndís Hrönn leikur í Samþykki í Þjóðleikhúsinu leikárið 2018-2019.
Arndís Hrönn lærði leiklist og leikhúsfræði í París. Hún hefur starfað sem leikkona á sviði, í sjónvarpi, í útvarpi og kvikmyndum og er ein af forsvarsmanneskjum leikhópsins Sokkabandsins. 

Meðal sýninga sem Arndís hefur nýlega leikið í má nefna  Lóaboratoríum eftir Lóu Hlín Hjálmtýsdóttur, Bláskjá eftir Tyrfing Tyrfingsson, Dúkkuheimilið eftir Henrik Ibsen og Hystory eftir Kristínu Eiríksdóttur í Borgarleikhúsinu. Í Hafnarfjarðarleikhúsinu lék hún m.a. í Gunnlaðar sögu og Mindcamp.

Arndís lék nýverið aðalhlutverkið í nýjustu mynd Gríms Hákonarsonar Héraðinu en myndin verður frumsýnd á næsta ári. Arndís leikur í  Ölmu, nýjustu mynd Kristínar Jóhannesdóttur, sem nú er í eftirvinnslu. Hún lék í sjónvarpsþáttaröðunum Föngum og Pressu og í kvikmyndinni Þröstum. 

Arndís fékkst við dagskrárgerð fyrir Ríkisútvarpið Rás 1 um árabil. Hún var meðal annars umsjónarmaður Víðsjár og hefur gert fjölmarga menningarþætti. 

Arndís var tilnefnd til Grímunnar fyrir leik sinn í Hystory og Gunnlaðar sögu. Hún var tilnefnd til Edduverðlaunanna fyrir leik sinn í sjónvarpsþáttaröðinni Pressu og kvikmyndinni Þröstum.