Allt leikárið

Mystery Boy

  • Eftir Smára Guðmundsson
  • Leikstjórn Jóel Sæmundsson

Áhugasýning ársins 2018 frá Leikfélagi Keflavíkur

  • Verð 3.000
  • Lengd 2 tímar eitt hlé
  • Frumsýning 24.5.2018
  • Svið Stóra sviðið
  • Mystery Boy

Áhugasýning ársins sýnd á Stóra sviðinu 24. maí

Miðasala á tix.is 

Athyglisverðasta áhugaleiksýning leikársins 2017-2018


Val Þjóðleikhússins á athyglisverðustu áhugaleiksýningu leikársins hefur nú farið fram í tuttugasta og fimmta sinn. Að þessu sinni sóttu alls fjórtán leikfélög um að koma til greina við valið með sextán sýningar. Formaður dómnefndar var Björn Ingi Hilmarsson leikari og leikstjóri, en með honum í dómnefnd sátu þrír leikarar Þjóðleikhússins, þau Eggert Þorleifsson, Guðrún S. Gísladóttir og Lilja Guðrún Þorvaldsdóttir. Fyrir valinu að þessu sinni varð sýning Leikfélags Keflavíkur Mystery Boy, og verður hún sýnd á Stóra sviði Þjóðleikhússins 24. maí.

Umsögn dómnefndar um sýninguna

"Sýning Leikfélags Keflavíkur á Mystery Boy eftir Smára Guðmundsson, í leikstjórn Jóels Sæmundssonar, er afar metnaðarfullur, nýr íslenskur söngleikur þar sem fjallað er á óvenjulegan hátt um mikilvæg málefni. Verkið er byggt á reynslu höfundar af því að fara í áfengismeðferð, en útfærslan er afar frumleg og djörf. Fantasíukennd nálgun höfundar við efnið er til þess fallin að gera efnið aðgengilegt og skemmtilegt fyrir nútímaáhorfendur. Um leið er fjallað um sígild viðfangsefni eins og ástina, frelsisþrána, óttann, átök um völd, baráttu góðs og ills, mannleg samskipti og það að upplifa sig á einhvern hátt utangarðs. Leikstjórnin einkennist af alúð og virðingu fyrir viðfangsefninu. Umgjörðin er einföld en notuð á hugvitssamlegan hátt og fallega lýst. Tónlistin er skemmtileg og vel flutt af hljómsveit og söngvurum, sem einnig standa sig vel í leik. Leikfélag Keflavíkur fær sérstakt hrós fyrir að ráðast af miklum metnaði í uppsetningu á nýju verki, með nýrri tónlist, þar sem þátttakendur leggja líf og sál í uppsetninguna." 

Kynningartexti frá Leikfélagi Keflavíkur

MYSTERY BOY (Yfirnáttúruleg ástarsaga) 

Kreysí keyrir í gegnum dimman og yfirgefinn skóginn á nýja mótorhjólinu sínu. Keyrir burt frá öllu ruglinu, nú ætlar hún að snúa við blaðinu. Loksins verður hún frjáls, eins og vindurinn sem fýkur um hárið hennar. Frjáls. En hvert er hún komin? Þetta eru ókunnugar slóðir. Hún er týnd. Skógurinn og myrkrið byrja að verða yfirþyrmandi. Hún stoppar hjólið, stígur af því og sér glitta í eitthvað við vegbrúnina. Sólgleraugu. Hún beygir sig eftir þeim og sér þá ljós inn á milli trjánna. Hlátrasköll. Þarna er líf. Þarna er bær. Hvaða bær er þetta? Hann er ekki merktur á neinu korti. Eru þetta talandi kettir? Þar kom að því ég er búin að missa vitið, kallar Kreisý inn í nóttina. Þannig hefst æsispennandi atburðarás þar sem Kreisý, hundurinn Olli og hinir talandi kettir sogast inn í fléttu þar sem örlagahjólin snúast hratt og óttinn virðist yfirtaka allt. En þar sem er ótti er líka von og hún virðist liggja hjá dularfullum manni sem kallar sig Mystery Boy. Í sameiningu reyna Kreisý og Mystery Boy að komast úr þessum bæ sem verður alltaf undarlegri og hættulegri með hverri mínútunni. Þessi saga er lauslega byggð á reynslu höfundar af því að vera í meðferð á Vogi þó að það komi aldrei beint fram. Bærinn í sögunni er meðferðarheimilið, það eru allir í sloppum og bara einn sími á svæðinu. Kreisý er búin að missa tökin á lífinu og fer í meðferð og þar hittir hún strák sem er í sömu stöðu. Saman taka þau á fíkninni í leit að betra lífi. Þetta er söngleikur sem inniheldur mikið grín en er þó með drungalegan undirtón. 

Leikskrá sýningarinnar

Smellið hér fyrir leikskrá á issuu.com

Næstu sýningar

  • Engin sýning framundan