KJARTAN RAGNARSSON lauk námi frá Leiklistarskóla Leikfélags Reykjavíkur árið 1966.

Hann lék í mörgum sýningum á vegum LR en fór brátt einnig að leikstýra og skrifa leikrit, en hann hefur auk þess gert leikgerðir. Kjartan hefur sjálfur leikstýrt flestum verkum sínum, en meðal þeirra má nefna Saumastofuna, Blessað barnalán, Jóa, Skilnað, Land míns föður og Íslensku  mafíuna sem sett voru á svið hjá Leikfélagi Reykjavíkur. Síðastnefnda verkið samdi hann ásamt Einari Kárasyni. Hann samdi Peysufatadaginn og Dampskipið Ísland sem fyrir Nemendaleikhús Leiklistarskóla Íslands. Leikrit Kjartans sem frumflutt hafa verið í Þjóðleikhúsinu eru Týnda teskeiðin, Snjór, Gleðispilið, Nanna systir, sem hann samdi í samvinnu við Einar Kárason, og Rauða spjaldið.

Meðal leikgerða Kjartans má nefna Ofvitann eftir sögu Þórbergs Þórðarsonar, Ljós heimsins og Höll sumarlandsins eftir Heimsljósi Halldórs Laxness, Djöflaeyjuna eftir sögu Einars Kárasonar og Evu Lunu eftir samnefndri skáldsögu Isabelle Alliende fyrir Leikfélag Reykjavíkur. Kjartan hefur áður sett upp tvær leikgerðir við Þjóðleikhúsið sem hann samdi ásamt Sigríði Margréti Guðmundsdóttur, Grandaveg 7 eftir bók Vigdísar Grímsdóttur og Sjálfstætt fólk eftir sögu Halldórs Laxness. Síðarnefnda leikgerðin var sýnd í tveimur hlutum undir heitunum Bjartur-Landnámsmaður Íslands og Ásta Sóllilja-Lífsblómið.

Meðal annarra leikstjórnarverkefna Kjartans má nefna Hamlet, Vanja frænda, Platonov, Þrúgur reiðinnar og Kontrabassann hjá Leikfélagi Reykjavíkur, Kirsuberjagarðinn, Stræti, Mávinn og Þrjár systur hjá nemendaleikhúsi Leiklistarskólans í Malmö, Platonov hjá Borgarleikhúsinu í Malmö, Grandaveg 7 við Borgarleikhúsið í Gautaborg, Ég er meistarinn eftir Hrafnhildi Hagalín Guðmundsdóttur í Gdansk í Póllandi og Pétur Gaut hjá Borås Statsteater. Nýlegustu  leikstjórnarverkefni Kjartans við Þjóðleikhúsið eru Antígóna, Hver er hræddur við Virginíu Woolf?, Anna Karenina, Jón Gabríel Borkmann, Sjálfstætt fólk, Rauða spjaldið og Svört mjólk.

Kjartan stofnaði og stýrir Landnámssetrinu í Borgarfirði og hefur framleitt þar fjölda leiksýninga á Söguloftinu.

Hann hlaut Stefaníustjakann fyrir störf sín að leiklist árið 2008.

Kjartan leikstýrir í vetur hér í Þjóðleikhúsinu eigin leikgerð byggðri á Heimsljósi eftir Halldór Laxness.