Menu
logo
28.febrúar 2017

Ove leggur land undir fót

Einn vinsælasti leikari þjóðarinnar, Siggi Sigurjóns, mun heimsækja bæði Austurland og Norðurland í mars þegar einleikurinn Maður sem heitir Ove verður sýndur á Egilsstöðum og í Skagafirði. Maður sem heitir Ove hefur gengið fyrir fullu húsi í Þjóðleikhúsinu í vetur og var sýndur við miklar vinsældir á Akureyri í janúar. Nú gefst áhorfendum í fleiri landshlutum tækifæri til að njóta samvista við þennan geðstirða Svía sem hefur heillað fólk um allan heim!

 

Leikritið fjallar um hinn 59 ára gamla Ove sem sumir myndu kalla "dæmigerðan Svía" - reglufastan nákvæmnismann, óþolandi smámunasaman og önuglyndan. Þegar ólétt kona að nafni Parvaneh flytur með fjölskyldu sína í götuna er eins og Ove byrji að missa tökin á öllu. Maður sem heitir Ove er bráðfyndinn og nístandi einleikur um sorg og gleði, einangrun og nánd.

 

Þjóðleikhúsið hefur í vetur lagt aukna áherslu á að færa leiklistina nær áhorfendum á landsbyggðinni, og var barnaleikritið Lofthræddi örninn Örvar frumsýnt í Vestmannaeyjum og sýnt víðsvegar um landið í kjölfarið.

 

Sýningarnar á Maður sem heitir Ove fara fram þann 18. mars í Valaskjálfi á Egilstöðum og þann 25. mars í Miðgarði í Skagafirði.

 

Hægt er að tryggja sér miða á heimasíðu Þjóðleikhússins, leikhusid.is.