Oddur Björnsson leikskáld og rithöfundur lést s.l. mánudag, 79 ára að aldri. Oddur var einn helsti frumkvöðull íslenskrar leikritunar á 7. og 8. áratug síðustu aldar og sýndi Þjóðleikhúsið sjö leikrita hans. Í heild liggja eftir Odd á fjórða tug leikrita fyrir leiksvið, útvarp og sjónvarp, en hann sinnti einnig öðrum ritstörfum.

Þjóðleikhúsið sýndi sjö leikrit eftir Odd:

·         Jóðlíf, 1965, leikstjóri Erlingur Gíslason

·         Hornakórallinn, 1967, leikstjóri Benedikt Árnason

·         Dansleikur, 1974, leikstjóri Sveinn Einarsson

·         Meistarinn, 1977, leikstjóri Benedikt Árnason

·         Krukkuborg, 1979, leikstjóri Þórhallur Sigurðsson

·         Eftir konsertinn, 1983, leikstjóri Oddur Björnsson

·         Þrettánda krossferðin, 1993, leikstjóri Þórhildur Þorleifsdóttir

Oddur leikstýrði leikriti sínu Eftir konsertinn hér í Þjóðleikhúsinu og þýddi tvö verk fyrir leikhúsið, Næst skal ég syngja fyrir þig og Endasprett.

Oddur Björnsson fæddist árið 1932 í Ásum í Skaftártungu. Hann nam leikhúsfræði við Háskólann í Vínarborg 1954-56 og kvaddi sér hljóðs sem leikskáld með fimm einþáttungum á árunum 1962-65. Hann starfaði með leikhópnum Grímu sem höfundur og leikstjóri, var leikhússtjóri hjá Leikfélagi Akureyrar 1978-80 og leikstýrði hjá Þjóðleikhúsinu, Leikfélagi Akureyrar og RÚV.

Oddur fékk menningarverðlaun DV árið 1981 fyrir leikstjórn á Beðið eftir Godot og heiðursverðlaun Grímunnar - Íslensku leiklistarverðlaunanna í júní á þessu ári fyrir framlag sitt til íslenskra sviðslista.

Þjóðleikhúsið þakkar Oddi fyrir framlag hans til starfs Þjóðleikhússins og leiklistar á Íslandi og sendir aðstandendum hans samúðarkveðjur.